புதினம் பார்க்கலாம் வாங்கோ....!

நண்பர்களே, நீங்கள் எல்லோரும் என் வீட்டுக்கு வந்தால், என்னுடைய ஆல்பத்தைக் காட்டுவேன் இல்லையா? நண்பர்கள், உறவினர்களுக்கு ஆல்பம் காண்பிப்பதே ஒரு சுகமான அனுபவம் தான். ஒவ்வொரு போட்டோவையும் காண்பித்து, அது தொடர்பான கதைகளைப் பகிர்வதில் அப்படி ஒரு சுகம்.

இந்த வலைப்பூவும் ஒரு வீடு மாதிரித் தானே? சரி, இப்போது நீங்கள் என் வீட்டுக்கு வந்திருக்கிறீங்க... இதோ என் ஆல்பத்தில் இருந்து சில போட்டோக்களை உங்களோடு பகிர்ந்து கொள்கிறேன் :) :)

01, நேற்று தந்தையர் தினத்துக்கு மகள் இலக்கியா தந்த அன்புப் பரிசு இது. கப் ஒன்றிலே, நாங்கள் இருவரும் சேர்ந்து எடுத்த படம் ஒன்றைப் பதித்து, ஆங்கிலத்தில் வாழ்த்து எழுதி தந்திருந்தா. 10 நாட்களாக எனக்குச் சொல்லாம, இரகசியமா, அவவும் சித்தப்பாவும் சேர்ந்து செய்த பரிசு இது. மனதுக்கு மிகுந்த மகிழ்ச்சியாக இருந்தது.

02, அப்பா இப்போது வைத்திருக்கும் சைக்கிள். பார்க்கப் பார்க்க ஆசையாக, மீண்டும் இதை ஓடவேண்டும் போல இருக்கு. சைக்கிளில் கொழுவி இருக்கும் Bag எங்கள் வாழ்க்கையில் முக்கியமான ஒரு பொருள். இப்படியான பைகளில் பொருட்கள் வாங்கிக்கொண்டு போய் அம்மாவிடம் கொடுத்த ஞாபகங்கள் வந்து போகுது. இதனை நாம் ‘பன் Bag' என்று அழைப்போம்.

03, எங்கள் குல தெய்வம் காளி அம்மனின் கோயில் இது. அண்மையில் இப்படி புனருத்தாரணம் செய்து, பூசை எல்லாம் செய்து அன்னதானம் கொடுத்தோம். வாழ்க்கையில் என்ன பிரச்சனை வந்தாலும் அம்மனை நினைத்தால் போதும், மகிழ்ச்சியும் ஆறுதலும் தானே கிடைக்கும்.

04, நல்லதொரு வீடு கட்ட வேண்டும் என்பது எங்கள் நீண்ட வருட கனவாக இருந்தது. சிறிய வயதில் நாம் வசதி குறைந்தவர்களாக இருந்தமையால் எம்மால் ஒரு பெரிய வீட்டைக் கட்ட முடிந்திருக்கவில்லை. இப்போது கடவுளின் அருளால் ஒரு பெரிய வீட்டைக் கட்ட முடிந்துள்ளது. வீடு முழுவதும் மாபிள் பதிக்க வேண்டும் என்பது எங்கள் ஆசையாக இருந்தது.

இது கட்டுமானப் பணிகள் நடைபெற்ற காலத்தில் தம்பி துவாரகன் எடுத்து அனுப்பிய படம்..! இப்பவே ஊருக்குப் போய், இந்த மாபிளில் படுத்து உருள வேண்டும் போல இருக்கிறது.

05, British Council அண்மையில் இங்குள்ள ஆங்கில ஆசிரியர்களுக்கான ஒன்றுகூடல் ஒன்றை நடத்தியிருந்தது. அதில் சிறந்த ஆசிரியர்களுக்கான விருதினை சில ஆசிரியர்களுக்கு வழங்கினார்கள். அதில் அடியேனும் ஒருவன். அப்போது எடுத்த போட்டோ.....,

( இந்த நிகழ்வை வீடியோ வடிவில் தர வேண்டும் என்பது என் விருப்பம். விரைவில் வெளியிடுகிறேன் ).

06, அண்மையில் யாழ்ப்பாணம் நல்லூர் கோயிலுக்குச் சென்ற வெள்ளைக்காரர்கள் சிலர் எமது கலாச்சார உடையில் கலக்கிய போட்டோக்கள் இவை. நண்பர் ஒருவர் எடுத்து அனுப்பியது. ஃபேஸ்புக்கிலும் முன்னர் பகிர்ந்திருந்தேன். நிறையப்பேர் Share பண்ணியிருந்தார்கள். அதில் இரண்டு படங்கள் உங்களுக்காக....

07, ஒவ்வொரு முறையும் போர்ட்டில் எழுதும்போது அதை போட்டோ எடுத்து வைப்பது என் வழக்கம். இது Flyers பிரிவு மாணவர்களின் வகுப்பில் அண்மையில் எடுத்த படம். என் கையெழுத்து அழகாக இருக்கா? :) :)

என்ன நண்பர்களே, இன்றைய போட்டோக்கள் யாவும் உங்களுக்குப் பிடிச்சிருந்திச்சா? சரி, இதில்  க்ளிக் செய்தால் இதுபோன்ற இன்னொரு ஆல்பத்தை நீங்கள் காணலாம்.